الواد ده

الواد ده كل شوية يشاغلنى
عامل يغمز بعنيه ومش سايبنى
ياماما يا بابا حوشوا الواد ده عنى
علطول وفى كل حتة ورايا مستقصدنى
مش عارف عايز ايه بس منى




بروح الجامعة يجى ورايا
اطلع على الكافتريا  برده معايا
يابنى امشى ايه الحكاية
رخامة غتاتة لازق فى قفايا




انا لو عايزة الم هلم كل الناس
هفضحك واجرسك كفاية خلاص
ايه يخربيتك كده مفيش احساس
انا زهقت من الكلام امشى يابن الناس
مانت لو متربى مش هتعاكس من الاساس






لو ليك اختك ترضاها ليها
حد مايسيبها ويعاكس فيها
اتقى ربنا فيا وفيها
داين تدان افتكر ديه وخليها
فى باللك





يمكن يبقى عندك دم
وتحس بقى انت ياعم
شايفة الناس بدات تتلم
روح اتعلم يمكن تفهم
ان الادب فضلوه عن العلم





مانا لو كنت فى جرائتك كنت اتكلمت
بس تعمل ايه من خجلى  انا اتعلمت
مردش على حد والتزم الصمت
هو ده معنى وجمال اى بنت




بقلمى
الشاعر
احمد جمال


على فكرة انا تانى مرة اكتب بطريقة البنت لان الواحد لازم يحس بكل انسان سواء ولد او بنت وفعلا البنات مش بتعرف تتكلم ولا ترد حاولت اكون وصلت كلامى بطريقة كويسة وبسيطة وفيها خفة دم وياريت فعلا الرسالة توصل ممكن بعد كده تيجى فى اختك
وشكرا






انتظرو مزيد من الشعر والتجديد فيه باذن الله

زهقان طهقان كوميدى

زهقان طهقان مدايق خايف من الامتحان
مواد تقيلة حاسسها مش زى زمان
كنا نذاكر من مصرواى وكيوت والفرقان
ونجيب تقدير كان بيبقى حلو يا سلام

خايف انا من السنادى مش عارف ليه
كليتنا كل مانعدى بتزيد صعوبة ليه
هما ليه بيعقدونا وقصدهم بيكون ايه

حرام عليكوا يا بشر سهرتونا ياما كتير
كنا بنام احنا والكتاب ويفضل سهران الضمير
خلاص ايه راح من قلوبكم راح الخير

بقولهالكم من دلوقتى يا دكاترة ومعيدين
كلها وربنا سنة متخفوش هنمشى وخالعين
بس ريحونا فى الامتحانات وخلوهم سهلين
ربنا يكرمكوا يارب وتجيبوا عيل واتنين
وتشوفهم فى مكان عالية ويكونوا مرتحين

بقلمى
الشاعر
احمد جمال

 

 

بالنسبة لينا كطلبة فى كلية الحقوق انا بتكلم عن الدكاترة والمواد بس بشكل كوميدى شوية ويارب تعجبكم

احلى شعب

ياولاد خافوا عليها ديه امانة
ربنا فى كتابه علينا وصانا
مصر عمرها ما هتبقى متهانة
عشان حبها ساب فينا علامة
مصر هيا وهتفضل ارض الكنانة



ياشباب عمروها خلينا نشوف احلى جنة
لو حتى من بعيد او من قريب او فى مكانا
فيها الاهرامات واعظم الحضارات والمسلة
واللى يعيش فيها اكيد ولازم ولابد هيتهنى
مفيهاش حاجة لما نتعب ونحس بعملنا




ايه يعنى مش لاقى شغل فيها
شوية وهتلاقى الخير من كل حتة ماليها
كنوزها ديه جوه الارض وتغطيها
صلح ونمى وعمر ولما تحتاجها هتلاقيها
بلاش كسل خليك ايجابى وصوت ليها




ايه يعنى نفسك تتجوز اصبر تنول
اصل مش كل حاجة بتيجى علطول
شوية شوية هيحصل تغيير بس انت قول
يارب انصرها واحميها وخلي العالم يقول
مصر ديه حضارة وتاريخ مش ممكن ولا معقول
ومتخافش هناكل الكفيار بدل الفول
ومن كتر اللحمة هتبقى عايش مسطول





وعلى العموم احنا مش مستعجلين
الخير هيجى هيجى واحنا مستنين
لما تشتغل بضميرك هنعيش مرتحين
ارضى ربك عن عمللك هنبقى فى السليم
ولانخاف من عسكر ولا امن ولا حتى مين




بقولهالك يا احلى شعب فى بلدى
انا واحد منكو بكتب اللى فى قلبى
لازم نخاف عليها ونخدها تحدى
هنبقى اجمد شعب ولا يوم هنهدى
وهنوصل للعالمية وهتشوف يا جدى
انا حفيدك وفداكى يا مصر يا بلدى





بقلمى
الوطنى
احمد جمال

اسف جدا

ليه بس بتحبى العند فيا
انا حبيتك بجد واسالى عنيا
كل اللى طلبته خافى على نفسك شوية
اصلى بحبك والغيرة طبع فيا



مش تحكم ولا سيطرة منى
كل اللى بيبقى شاغلنى
انك تصونى نفسك ده اللى هاممنى
مراتى وبحبك وغالية اوى عندى





حلفتى عليا انك مش هتاكلى
وانتى عارفة ان ده اللى بيضايقنى
عايزك تعرفى ان ده تعبنى
ودمعى والله كان هو سابقنى





انا عمرى ماهيجى يوم وهبقى قاصد ازعللك
كل الحكاية انها لحظة شيطان ونفسى اساللك
مهما حصل مابينا خدنى بين ايديكى واحضنك
هتنسى كل اللى حصل من اول ما المسك
بنسى فى ثوانى اى زعل عشان بعشقك






الفراق صعب اوى ومقدرش اتحمله
الطريق لوحدى ماينفعش  اكمله
لازم انا وحبيبتى على القمر نرسمه
والنور اللى من بعيد  عايز المسه
نور عنيكى شايفه بيقرب عشان اخطفه




بحلم اكون لحد دلوقتى  لسه فى بالك
انا الوحيد اللى هفضل عايش فى خياللك
اصللك ماتعرفيش تعيشى من غيرى انا كيانك
مينفعش انا ابقى لوحدى وانتى فى حاللك




انا وانتى  كنا زمان لسه اتنين
الحب جمعنا بقينا واحد ومش تايهين
عشان خدنى طريق اسمه الحنين
خطيتى برجيللك عليه نادى باسمين
احمد ومعاه  حبيبت قلبى المسكين
اسف جدا لو زعلت لوحتى ثانتين





اسف جدا
بقلمى
احمد