الاثنين، 23 أبريل 2012

عدى وفات


بسرعة عدى عليا الوقت وفات
وعمرى اغلبه خلاص بقى ذكريات
فين لما كنت قاعد بحسب الساعات
انى اكبر فى يوم واعمل لحياتى انجازات






الايام اتخطفت منى ومحستش فعلا بيها
دلوقتى ماسك عصاية وادينى بتعكز عليها
ويارتنى كنت استمتعت بكل لحظة مرت فيها
عمرى عدى بيا وفيه حاجات كتير ناسيها




فين ايام لما كنت لسه ببدا اول المشوار
كنت ملتخبط ومش عارف حتى اخد قرار
والدنيا توهتنى وياما غربتنى وخلتنى محتار
حالا كده السرعة فى الحياة خليت الوقت طار






يااااااااااه فاكر الصورة ساعت لما اتصورتها
والعيال اصحابى واحلامنا وكل حاجة اتخيلتها
وابو رجل مسلوخة وقصص كتير انا ياما صدقتها
حياتى زمان كانت بسيطة واقدر اقول انى فهمتها






فاكر اصحابى لسه فاكر ايام لما كنا فى المدرسة
لما نذاكر ونعمل الواجب ودرجتنا كانت بتبقى كويسة
كان نفسى ابقى ضابط وصاحبى عايز يدخل هندسة
ولما مانعملش الواجب تيجى بسرعة وتضربنا المدرسة




فاكر كل الايام وبحلم من تانى ارجع صغير
واحلامنا اللى كانت زى ماهيا ومكانتش بتتغير
طفولتنا كانت جميلة وكانت فيها شئ يحير
احلى ايام عشناها فى السن ده ويا اصحابنا
لكن دلوقتى  العمر بقى بيسابق الزمن بقى قصير




ياااااه  على الوقت وعلى ديه كانت ايام
عديت هوا ومحستش بيها بس انا زعلان
نفسى ترجع الذكريات وترجع من تانى الايام
مكانش فى بالنا ساعتها لا هموم ولا احزان




مراحل كتير شايفها راحت من عمرنا
والوقت مابيقفش لما نفكتر لحظة تهزنا
لو ينفع كنت وقفته فى ايام مليانة بفرحنا
رسالتى لكل حد شايف كلامى اصغر مننا
متخليش لحظة زعل واحدة تبقى بينكم زينا


وقطر الحياة بيفوت واحنا خلاص ركبناه
واللى عدى مش هتعرف ترجعه ولا تنساه
كل ذكرى حلوة ولا مرة مرت بينا فى الحياة
مفيش غير انك تفتكرها وبكره حاول تلقاه







بقلمى
ذكريات انسان
اكيد كلنا بنمر بلحظات نفتكر فيها
كل اللى عدى واللى فات
وساعات بنقول من جوانا ياريت ترجع
تانى الايام ديه لانها احلى ايام
بس مش بنعرف غير اننا نفتكرها
واحنا بنكبر فى كل يوم


يارب تعجبكم

الخميس، 19 أبريل 2012

الفيس بوك

الفيس بوك مبقاش خلاص فيه جديد
واللى بنعمله كل يوم هو هو وفيه بنعيد
تعمل كومينت ولا لايك صفحة وعددها يزيد
وانت مفيش حاجة بتعملها وممكن تستفيد




عندك اصحاب كتير بس انتوا مابتتكلموش
فيه اللى ضايفك وخلاص المهم ميهموش
وفيه كمان اللى ضافك وانت اساسا متعرفوش
بقيت عادة بتتعمل لكن انتوا معاه مابتفرقوش




اون لاين ولا اوف بتدور على حاجة تعملها
اصل فيه حاجات جواك ونفسك تكسرها
لكن حياتك عمرها مينفع فى يوم تضيعها
ابدا بحاجة صغيرة تنفعك ومش مهم كبرها




الفيس بوك اشكال والوان كتير من الناس
فيه منهم منفض ويهمه لعبة المزرعة وخلاص
وفيه اللى بيغير صورة بروفيله ده عنده اساس
وفيه بيتكلم مع البنات ورومانسى جدا وحساس
وفيه اللى بيحلم ان الفريندز عنده تزيد وخلاص





عالم غريب وديه حقيقة كلنا واكيد عايشنها
بس اعمل اللى انت عايزه بس مش تدمنها
علشان لما تحب فى يوم تبعد تقدر تبطلها
اعمل حاجة مفيدة دور على شغلة تشتغلها



مهما اتكلمت ووصفت الناس فيه لسه كتير
على الفيس وفى الشارع محتاجين للتغيير
فيه اللى قلوبهم فيه شر وفيه اللى مليان خير
وفيه اللى لفشله بقى مقيد وخلاص اسير
وفيه اللى كبر دماغه وخد على التكبير






متجيش تقولى انا حاسس دلوقتى بالضيق والغم
مانت بتعمل نفس الحاجة وشيلت نفسك ليه الهم
قوم ماتقعدش كتير على الكرسى وخلى عندك دم
بس متنساش ربنا وخلى باللك من نفسك ياعم





الفيس بوك وسيلة للتواصل لا اكتر ولا فى يوم اقل
روح ذاكر وانت اشتغل وانت كمل ومتقولش مفيش عمل
لسه عايش وفيك نبض يبقى متايسش وفيه الامل
وساعتها هيروح منك الضيق وياخد فى سكته اى ملل












بقلمى
بلاش الفيس بوك
هههههههههههههههههههههه
ياعم ده خنقة وممل والله
بس احسن حاجة فيه الناس اللى زى العسل
للى نعرفها وغير كده مفيش
ومتقعدش كتير عليه احسن تتجن
هههههههههههههههههههههه
انا قولت اكسر الملل وحاول تستفيد بوقتك
احسن وربنا يوفقنا كلنا

الاثنين، 16 أبريل 2012

اااااااااااااااااااااااااااااه لو انا ابقى رئيس






اااااااااااااااااااااه لو انا ابقى رئيس
هخلى كل الشعب من تانى يعيش
وهياكل كل يوم جمبرى وسوسيس
وكل عازب هجوزه وهيبقى عريس
ومفيش تحديد نسل وهيسيبه يجيب وريث




ااااااااااااااااااااااااااااااه لو انا ابقى رئيس
هنضف كل البلد من الناس الحرامية
هشغل كل شاب وزير وظابط فى الداخلية
وهلغى كل محالات الفول ومفيش طعمية
واللحمة هتتوزع ببلاش وشيل خلاص الماهية



ااااااااااااااااااااااااااااااااااه لو انا ابقى رئيس
شعبى انا عمرى ما فى يوم اقدر اهينه
كل يوم هياكل عيش الكيزر ومعاه الفينو
وادعى علطول ربنا يسعده ويارب عينه
هحلى كل الدنيا واخلى يعيش سنينه



اااااااااااااااااااااااااه لو انا ابقى رئيس
هلغى الجنيه واخلى العملة تبقى بالدولار
مفيش من تانى وكالة البلح وهتروح سفن ستار
عايزك تلبس وتتدلع ومفيش خلاص فرق الاسعار
بس يالا تعالى انتخبنى وخد بسرعة القرار



ااااااااااااااااااااااااااااااه لو انا ابقى رئيس
هخلى الغش يبقى مسموح فى كل الجامعات
مفيش دفعة مقبول كله هياخد خلاص امتيازات
وهحط فى كل حمام معطر ومعاه تكفيات
ومفيش دروس خصوصية وهتجيللك كل الامتحانات



ااااااااااااااااااااااااااااااااااااه لو انا ابقى رئيس
كل اللى نفسك فيه هخليك من غير تفكير تعمله
واللى عايزه من زمان هيبقى حقيقة ومش هتحلمه
انا جيت هنا واللى ربنى هيقدرنى عليه هعمله
مش هسيب حد حزين غير الا لما احاول افرحه



ااااااااااااااااااااااااااااااااااه لو انا ابقى رئيس
مش هخلى حد تانى يسافر هجرة غير شرعية
هعمل لكل بنى ادم باسبور ويتفسح فى الدول العربية
لو حبيت تروح دمياط ماشى او تروح المنوفية
لو حبيت تروح لوحدك ماشى او تاخد معاك الولية



ااااااااااااااااااااااااااااااااااااااااااااه لو انا ابقى رئيس
هلغى الميه وهنزللك من حنفية بيتكم مية بيبسى
و كل يوم خميس هعمللك حفلة وتغنى فيها نانسى
ويوم الجمعة هتلف فى تراك النادى بالترنيج والكوتشى
وانا ليك حقيقة واضحة وقول ليا احلامك ومتحلمشى



ااااااااااااااااااااااااااااااااااااااه لو انا ابقى رئيس
مش هيبقى فيه طبقية ومحدش هيرفع راسه عليك
واللى يشتمك فى يوم متعملش حاجة واقلع اللى فى رجليك
لو مش عايز تتعب اتصل بشرطة الجزم وانت خليك
هتخليه يسنى اسمه وانا غلط فى يوم فى معاليك


ااااااااااااااااااااااااااااااااااااه انا لو ابقى رئيس
هسفرك بره تعمل فحوص طبية كل 6 شهور
علشان اطمن عليك انا منك ومن غير ماتدور
ومتقوليش عليا انى متبكر او لاسمح الله مغرور
انت شعبى ولازم اخاف عليك واخليك دايما مسرور






بقلمى
المرشح المحتمل للرئاسة
احمد جمال



ويارب يعجبكم برنامجى الانتخابى
وشكرا

الخميس، 12 أبريل 2012

مفيش حد يستاهل

قلبى تعابنى وحاسس فيه بنار
كل مافكر مش عارف اخد قرار
واللى انا فيه خلانى خلاص احتار
وحياتى حاسسها بقيت ليه دمار



مخنوق اوى ومحدش حاسس بيا
دموعى مش راضية تنزل من عنيا
لقيت نفسى بقيت لوحدى الضحية
خسرت كتير وروحى مبقتش فيا


كل ماشوفى حالى بقول انتهيت
واستاهل اللى جرالى وانا اتهديت
محدش يستاهل ولقتينى بكيت
مكانى مش هنا يارتنى ماستنيت


عايز ابعد واروح بعيد واسيب المكان
طاقتى مفيش ومش مستحمل احزان
ياريت امسح جروحى لو كان بالامكان
مفيش طريق امشيه وصلت للجنان



محدش بيشترى والكل عايز يسيبنى
فرطوا فيا كتير وناس كتير بتبعينى
ياريت القى حد ممكن ويقدر يفهمنى
بس يكون فين الشخص اللى يقدرنى



مش زعلان على نفسى واللى حصل
من كتر ماشفت لقيت قلبى خلاص قفل
انا فصلت خلاص من الناس وومفيش عمل
والحزن اللى جوايا كتير وماعدش يحتمل



حياتى مكانتش لعبة ولا ليكى فيها خلاص
انا قدرت اعيش ومستعد اموت فيا الاحساس
ميهمنيش حد دلوقتى انا غلطت من الاساس
والكل بيتفرج انا مش مصدق حد من الناس



يالا غلطة فى عمرى ويارتنى اعرف انسها
وجروحى ربنا يقدرنى واعرف القى دواها
الوحدة ساعات بتفيد وحشتنى ويا محلاها
متسبش حياتك لحد يعتبرها فى يوم تفاهة



رسالة ليك يا قلبى وانا خلاص اللى قررت
مفيش حد يستاهل ودلوقتى اقدر اقول ارتحت
قفلت عليك ومفتاحك ضاع منى لما اتجرحت
انا محسبتهاش صح لما فيك يوم انا فرطت







بقلمى
احمد جمال