اصحبت خريجا وزادت المسؤلية
والصراحة بصوا مش ناقصة العملية
ودماغى بتفكر ولو هجرة غير شرعية
مفيش شغل والحكاية ده منتهية
ولما ابقى عاوز اسافر يقولوا فين هتروح
خليك فى بلدك اولى وخلى فيه طموح
ولو سبت بلدى هحس بالوحدة والجروح
ولو فيه بقى كوسة يبقى كل شئ مسموح
مهيا دلوقتى الكوسة بقيت هدفنا الاساسى
وهتلاقى الوظيفة وتقعدك على الكراسى
طيب وايامى اللى فاتيت وانا منها بقاسى
ولما بنجح فرحتى بتسعد كل ناسى
ويقولى بلدك ديه مش بتعات شهادات
لو عايز تشتغل ان شاء الله مندوب مبيعات
ومذاكرة اربع سنين ديه مش كفاية ولا اثبات
والشغل موجود يالا وحاول تنسى اللى فات
يقولى ياحبيبى الكلام ده مش هياكللك عيش
شهادة مين؟ ده الشغل اللى موجود ياما مفيش
احمد ربنا على انك لقيت شغلة بكر متلاقيش
انا بقول الحمد لله علطول بس ده ميناسبنيش
ليه يا بلدى مليش حق فيكى وراح الخير
راح مع كل حلم واللى كان بيلازمه الضمير
واحنا مش ناويين نتغير ونبدا يالا بالتتغير
ولا الكوسة هتخلى ابن الباشا هو الكبير
حسيت بالاحباط ومفيش امل من اى اتجاه
حلمى اللى كنت بحلمه اتحول فجاة لمعاناة
وكان الحياة قبل ماتبدا وصلت لطريق المنتهى
والمستقبل اللى كنت بحلم بيه خلاص لازم انساه
لكن مهما هيحصلى برده عندى امل فى الله
ربنا مبيضيعش مجهود حد تعب وعلى تعبه اده
ومادام نور الشمس بيطلع حلمه هيتولد معاه
مهما عمرى طال لازم ابقى مؤمن وحلمى هستناه
بقلمى
احمد جمال
